செய்திகள்

தமிழக அரசியலில் ஒரு மிகப்பெரிய அதிரடி மாற்றமாக, அதிமுகவின் முன்னாள் ஒருங்கிணைப்பாளரும், முன்னாள் முதலமைச்சருமான ஓ. பன்னீர்செல்வம் (OPS) இன்று (பிப்ரவரி 27, 2026) அதிகாரப்பூர்வமாக திமுகவில் (DMK) இணைந்தார்.

இன்று காலை, அண்ணா அறிவாலயத்தில் முதலமைச்சர் மு.க. ஸ்டாலின் முன்னிலையில் முன்னாள் முதல்வர் ஓ.பன்னீர்செல்வம் அவரது மகனும், முன்னாள் எம்.பி.யுமான ரவீந்திரநாத்துடன் தன்னை திமுகவில் இணைத்துக் கொண்டார். அப்போது துணை முதல்வர் உதயநிதி ஸ்டாலின், அமைச்சர்கள் கே.என்.நேரு, எ.வ.வேலு, சேகர்பாபு ஆகியோர் உடன் இருந்தனர்.

அதிமுகவில் எடப்பாடி பழனிசாமி (EPS) உடனான நீண்ட கால சட்டப் போராட்டங்கள் மற்றும் அரசியல் மோதல்களுக்குப் பிறகு, அதிமுகவில் மீண்டும் இணைய வாய்ப்பில்லை என்பதை உணர்ந்த ஓபிஎஸ் இந்த முடிவை எடுத்துள்ளார். தென் தமிழகத்தில், குறிப்பாக முக்குலத்தோர் சமூக வாக்குகளைக் குறிவைத்து திமுக இந்த காய்நகர்த்தலைச் செய்துள்ளதாகக் கருதப்படுகிறது. மேலும் 2026 சட்டமன்றத் தேர்தலுக்கு இன்னும் சில வாரங்களே உள்ள நிலையில், இந்த நகர்வு தமிழக அரசியலில் பெரும் பரபரப்பை ஏற்படுத்தியுள்ளது.

திமுகவில் இணைந்த பிறகு ஓ.பன்னீர்செல்வம் செய்தியாளர்களுக்கு அளித்த பேட்டியில், “அண்ணா ஆரம்பித்த தாய்க் கழகமான திமுகவில் மன மகிழ்ச்சியுடன் இணைந்துள்ளேன். அண்ணா, கருணாநிதி காட்டிய வழியில் அனைவரையும் அரவணைத்து செல்லும் வகையில் கட்சியையும், ஆட்சியையும் மு.க.ஸ்டாலின் வழிநடத்தி வருகிறார். சர்வாதிகாரமாக நடந்துகொள்ளும் எடப்பாடி பழனிசாமியால், எந்த காலத்திலும் இனி வெற்றிபெற முடியாது” என முன்னாள் முதல்வர் ஓ.பன்னீர் செல்வம் தெரிவித்தார்.

ஓ. பன்னீர்செல்வத்தின் அரசியல் பயணம்: ஒரு பார்வை

ஓபிஎஸ் அவர்களின் அரசியல் வாழ்க்கை ஒரு தேநீர் கடை உரிமையாளராகத் தொடங்கி, தமிழகத்தின் முதலமைச்சர் நாற்காலி வரை உயர்ந்த ஒரு வியத்தகு பயணமாகும்.

#தொடக்க காலம்

* 1969: தனது 18-வது வயதில் ஒருங்கிணைந்த திமுகவில் ஒரு தொண்டராகவே தனது அரசியல் வாழ்வைத் தொடங்கினார்.
* 1973: எம்.ஜி.ஆர் திமுகவிலிருந்து பிரிந்து அதிமுகவைத் தொடங்கியபோது, அவருடன் இணைந்து அதிமுகவின் ஆரம்பகால உறுப்பினரானார்.
* 1996: பெரியகுளம் நகராட்சித் தலைவராகத் தேர்ந்தெடுக்கப்பட்டார். இதுவே அவரது முதல் தேர்தல் வெற்றி.

#ஜெயலலிதாவின் நம்பிக்கைக்குரிய 'விசுவாசி'

மறைந்த முன்னாள் முதலமைச்சர் ஜெயலலிதா அவர்கள் நெருக்கடியான நேரங்களில் எல்லாம் தனது முதலமைச்சர் நாற்காலியை ஒப்படைக்கத் தேர்ந்தெடுத்த ஒரே நபர் ஓபிஎஸ் தான்.

* 2001 - 2002 | முதலமைச்சர் (1-வது முறை) | டான்சி வழக்கில் ஜெயலலிதா பதவி விலகியபோது.
* 2014 - 2015 | முதலமைச்சர் (2-வது முறை) | சொத்துக் குவிப்பு வழக்கில் ஜெயலலிதா சிறை சென்றபோது.
* 2016 - 2017 | முதலமைச்சர் (3-வது முறை) | ஜெயலலிதாவின் மறைவுக்குப் பிறகு.

# தர்மயுத்தம் மற்றும் அதிகாரப் போட்டி

* 2017: சசிகலாவுக்கு எதிராக மெரினா கடற்கரையில் தியானம் இருந்து 'தர்மயுத்தம்' தொடங்கினார். இது அதிமுகவில் பெரும் பிளவை ஏற்படுத்தியது.
* 2017 - 2021: இபிஎஸ் அணியுடன் இணைந்து துணை முதலமைச்சராகப் பணியாற்றினார்.
* 2022 - 2025: ஒற்றைத் தலைமை மோதலால் அதிமுகவிலிருந்து நீக்கப்பட்டார். நீதிமன்றப் போராட்டங்கள் தோல்வியடைந்த நிலையில், தனது ஆதரவாளர்களுடன் தனித்து இயங்கி வந்தார்.

அவர் தற்போது திமுகவில் இணைந்ததன் மூலம் ஒருவழியாக தர்மயுத்தம் முடிவுக்கு வந்துள்ளது.

ஓ.பன்னீர்செல்வத்தை வரவேற்று மு.க.ஸ்டாலின் (@mkstalin) தனது எக்ஸ்(x.com) பதிவில் "முன்னாள் முதலமைச்சரும் அருமைச் சகோதரருமான திரு. ஓ.பன்னீர்செல்வம் அவர்கள் தாய்க்கழகமாம் திராவிட முன்னேற்றக் கழகத்தில் இணைந்துள்ளார். அவரை வருக வருக என வரவேற்கிறேன்.
திராவிட இயக்கத்தின் மாபெரும் தலைவரின் பெயரைத் தாங்கிய அவர் திராவிட இயக்கக் கொள்கை காக்கும் நம் பேரியக்கத்தில் இணைந்துள்ளார்.
2026 சட்டமன்றத் தேர்தல் என்பது தமிழ்நாட்டுக்கும் பாசிச பா.ஜ.க.வுக்கும் இடையிலான ஜனநாயகப் போர். இதனை உணர்ந்துதான் பல்வேறு ஜனநாயக சக்திகளும் கழகக் கூட்டணியில் இணைந்து வருகிறார்கள். நம்மோடு இணைந்துள்ள சகோதரர் ஓ.பன்னீர்செல்வம் அவர்கள் அன்பானவர், பண்பானவர், அடக்கமானவர்! அவரது வரவு நல்வரவாகட்டும்! தமிழ்நாடு வெல்லட்டும்! " என்று பதிவிட்டுள்ளார்.